வரைக்காட்சிப் படலம் - 914

அரசர்கள் படமாடஞ் சேர்தல்

படமாடங்களில் வதிதல்
 
914.

தாள் உயர் தடக் கிரி இழிந்து தரை சேரும்
கோள் அரி என. கரிகள் கொற்றவர் இழிந்தார்;
பாளை விரி ஒத்து உலவு சாமரை படப் போய்.
வாள் எழ நிரைத்த படமாடம்அவை புக்கார்.
 
கொற்றவர் -  (யானையை ஊர்தியாகக் கொண்ட) அரச குமாரர்கள்;
தாள்   உயர் தடகிரி  இழிந்து  -  தாழ்வரை  உயர்ந்துள்ள  பெரிய
மலையிலிருந்து  இறங்கி;  தரை சேரும் - நிலத்தை அடையும்; கோள்
அரியென   -  வலிய  சிங்கத்தைப்  போல;  கரிகள்  இழிந்தார்  -
யானைகளிலிருந்து  கீழே  இறங்கியவராய்; பாளை விரி ஒத்து உலவு -
விரிந்த    பாளையை   ஒத்து  (தம்  இரு  புறங்களிலும்)  அசைகின்ற;
சாமரை படப்  போய்  -  சாமரைகள்  வீசும்படி சென்று; வாள் எழ
நிரைத்த  -  ஒளி எழும்படி ஒழுங்காக அமைத்த; படமாடம் அவை -
கூடாரங்களில்; புக்கார் - புகுந்தார்கள். 

அரச   மைந்தர்கள் யானைகளிலிருந்து இறங்கி. இருபக்கமும் வெண்
சாமரைகள்   வீசப்   பெறக்   கூடாரங்களில்    புகுந்தனர்   என்பது.
யானைகளிலிருந்து    இறங்கிய    அரச   குமாரர்க்கு  மலையிலிருந்து
இறங்கிய  சிங்கம்   உவமையாம்.  மலையடிவாரத்தில்  அமைந்த குகை
கூடாரத்திற்கு உவமையானது.                                  17