குலமுறை கிளத்து படலம் - 747

தாடகை மக்களின் மறைவு

747.    

‘செக்கர் நிறத்து எரி குஞ்சிக்
   சிரக் குவைகள் பொருப்பு என்ன
உக்கவோ முடிவு இல்லை;
   ஓர் அம்பினொடும். அரக்கி
மக்களில். அங்கு ஒருவன் போய்
   வான் புக்கான்; மற்றையவன்
புக்க இடம் அறிந்திலேன்;
   போந்தனென். என் வினை முடித்தே.
   
செக்கர் நிறத்து- செவ்வானம் போன்ற நிறம் கொண்ட; எரி குஞ்சி
- நெருப்புப்   போல   மயிர்களையுடைய;   சிரம்        குவைகள்
-  (எனது வேள்விக்கு இடையூறு செய்த  அரக்கர்களின்)   தலைகளின்
குவியல்; பொருப்பு  என்ன  -  மலைகளைப்  போல; உக்கனவோ-
அறுபட்டு  விழுந்து  கீழே  சிதறியவற்றிற்கோ;  முடிவு இல்லை - ஓர்
அளவே  இல்லை; அங்கு- அப்போது;  (அந்த இடத்தில்);   அரக்கி
மக்களில்   ஒருவன்   -   அத்  தாடகையின்  மைந்தர்  இருவருள்
ஒருவனான  சுபாகு;  ஓர்  அம்பினொடும் - (இராமன் எறிந்த) அம்பு
தைத்த மாத்திரத்தில்; போய் வான் புக்கான் - உயிர் நீத்து வானுலகம்
சேர்ந்தான்;  மற்றையவன்  -  மற்றொரு  மைந்தனான மாரீசன்; புக்க
இடம்   -   (இவன்   எய்த  அம்பால்)  போய்  விழுந்த  இடத்தை;
அறிந்திலேன் - யான் அறியவில்லை (இவ்வாறு இடையூறு  அகப்பட்ட
பின்பு);  என் வினை முடித்து - என் வேள்வியை நிறைவாகச் செய்து
முடித்து; போந்தனென் - (இங்கே) வந்தேன்.

பொருப்பு:  இந்திரனால்  சிறகு  அரியப்பட்டு  மண்ணில்   விழுந்த
மலைகள்.                                                27