எழுச்சிப் படலம் - 888

தசரதன் புறப்படுதல்

தயரதன் சென்ற காட்சி
 
888.

நித்திய நியமம் முற்றி.
   நேமியான் பாதம் சென்னி
வைத்த பின். மறை வல்லோர்க்கு
   வரம்பு அறு மணியும் பொன்னும்.
பத்தி ஆன் நிரையும். பாரும்.
   பரிவுடன் நல்கி. போனான்-
முத்து அணி வயிரப் பூணான்.
   மங்கல முகிழ்த்த நல் நாள்.
 
முத்து  -   முத்துக்களினாலும்;   அணிவயிரம்  - அழகிய வயிர
மணிகளாலும்;   பூணான்   -  இயன்ற  அணிகளைப்  பூண்டவனான
தசரதன்;  நித்திய நியமம்  முற்றி  -  (தன்)  நித்தியக் கடமைகளை
முடித்துவிட்டு;  நேமியான் பாதம்  -  சக்கரம்  ஏந்திய  திருமாலின்
பாதங்களை;  சென்னி வைத்தபின் - (தன்) முடியிலே வைத்த பின்பு;
(குலதெய்வமான திருமாலை வணங்கின பின்னர்); மறை வல்லோர்க்கு
-  வேதங்களில் வல்ல அந்தணர்களுக்கு; வரம்பு அறு - எல்லையற்ற;
மணியும்  பொன்னும்  -  இரத்தினமும்  பொன்னும்;  பத்தி  ஆன்
நிரையும் - வரிசையான பசுக் கூட்டங்களையும்; பாரும் - பூமியையும்;
பரிவுடன் -  மன  மகிழ்ச்சியோடு; நல்கி - தானம் செய்து; மங்கலம்
முகிழ்த்த- மங்கலம் மலர்ந்த; நன்னாள் - நல்ல நாளில்; போனான்-
புறப்பட்டுச் சென்றான். 

அரசர்கள் பயணத்தைத் தொடங்குவதற்கு முன் இரத்தினம். பொன்.
பசு.  பூமி  முதலியன தானம் செய்தல் மரபு. திருவடியைச் சென்னியில்
வைத்தல் என்பது வீழ்ந்து வணங்குதலாகும்.                    72