எழுச்சிப் படலம் - 893
ஒலியும் ஒளியும் மிஞ்சுதல்
893.
சங்கமும் பணையும் கொம்பும்
தாளமும் காளத்தோடு
மங்கல பேரி செய்த
பேர் ஒலி மழையை ஓட்ட.
தொங்கலும் குடையும் தோகைப்
பிச்சமும் சுடரை ஓட்ட.
திங்கள் வெண்குடை கண்டு ஓட.
தேவரும் மருள. - சென்றான்.
சங்கமும் - சங்க வாத்தியமும்; பணையும் - புல்லாங்குழலும்;
கொம்பும் - ஊதுகொம்புகளும்; தாளமும் - கைத்தாளமும்;
காளத்தோடு - எக்காளமும்; மங்கல பேரி - மங்கலத்தைத்
தெரிவிக்கும் பேரிகையும்; செய்த பேரொலி - எழுப்பிய பெரிய
ஓசையானது; மழையை - மேகத்தில் தோன்றும் இடியை; ஓட்ட -
துரத்தவும்; தொங்கலும் - பூமாலைகளும்; குடையும் - குடைகளும்;
தோகைப் பிச்சமும் - ‘மயிலின் தோகையால் செய்த பிச்சங்களும்;
சுடரை ஓட்ட - வெயிலை மறைக்கவும்; திங்கள் வெண்குடை -
சந்திரன் வெண்கொற்றக் குடையை; கண்டு ஓட - கண்டு ஓடவும்;
தேவரும் மருள - தேவர்களும் மயங்கும்படி; சென்றான் - (தசரதன்)
மேன்மையாகப் போனான்.
தொங்கல் முதலியன அரசர் செல்லும்போது பிடிக்கப்படும்
விருதுகள். பிச்சம் - மயில்பீலியால் செய்யப் பெற்ற ஒன்று.
வெண்கொற்றக் குடையின் நிறமும். குளிர்ச்சி தரும் பெருமையும்
தனக்கு இல்லையே என்று சந்திரன் வெட்கப்பட்டு ஓடினான்
என்பது. 77
